මෙරට වැඩිහිටි ජනගහණයෙන් සියයට හයත්, සියයට හතත් අතර පිරිසක් ඩිමෙන්ෂියා රෝගීන් බවට පත්ව ඇති බව ශ්‍රී ලංකා වෘද්ධ වෛද්‍ය විද්‍යා සංගමයේ ලේකම්, වෘද්ධ මානසික රෝග පිළිබඳ විශේෂඥ වෛද්‍ය මල්ෂා ගුණරත්න පැවසුවාය .
එසේම වර්තමානයේ තරුණ පිරිස රට හැර යාමත් සමග ද නිවෙස්වල සිටින වැඩිහිටියන් තනිවන බවට හඳුනාගෙන තිබේ.
පසුගිය පළමුවැනිදාට යෙදුණු ජ්‍යාත්‍යන්තර වැඩිහිටි දිනයට සමගාමීව වැඩිහිටි ප්‍රජාවගේ සෞඛ්‍ය ප්‍රවර්ධනය, ඔවුන් ලෙඩ රෝගවලින් වළක්වා ගැනීම මෙන්ම ඔවුන්ගේ වැඩිහිටි අවධිය සෞඛ්‍ය සම්පන්නව ගතකිරීම පිළිබඳව ඊයේ (04 වැනිදා) සෞඛ්‍ය ප්‍රවර්ධන කාර්යංශයේ පැවැති මාධ්‍ය හමුවට එක්වෙමින් විශේෂඥ වෛද්‍යවරිය ප්‍රකාශ කළේ හික්කඩුව ප්‍රදේශයේ සිදුකළ සමීක්ෂණයකදී වැඩිහිටියන් සියයට හතළිස්අටදෙනකු තනිකමින් පෙළෙන බව අනාවරණය වී ඇති බවය.
එසේම ජන හා සංඛ්‍යාලේඛෙන දෙපාර්තමේන්තුව විසින් සිදුකරනු ලබන සමීක්ෂණයකින් හෙළිවී ඇත්තේ වැඩිම වැඩිහිටියන් සංඛ්‍යාවක් ඇත්තේ බස්නාහිර පළාතේ බවය.
වයස අවුරුදු හැට සම්පූර්ණ කරනු ලබන පුද්ගලයින් වැඩිහිටියන් ලෙස හඳුන්වනු ලබන අතර අවුරුදු හැටත් හැටනවයත් වයස් කාණ්ඩයේ පසුවන අය තරුණ වැඩිහිටියන් ලෙස හඳුන්වනු ලබයි.
වයස අවුරුදු අසූවට ඉහළ පුද්ගලයින් වයෝවෘද්ධ අය ලෙස හඳුන්වනු ලබන අතර ඔවුන් පිළිබඳව නිවැසියන් විශේෂ උනන්දුවක් දැක්විය යුතුය.
තවද වැඩිහිටියන්ට ඖෂධ වර්ග පහකට වඩා ලබාදීමේදී ඉතා ප්‍රවේශම් විය යුතු බවත් ඉන් වෙනත් ආබාධ ඇති විය හැකි බවත් වෛද්‍යවරු පෙන්වා දෙති.
ඒ අනුව වැඩිහිටි පුද්ගලයින්ට ශාරිරික ආබාධ මෙන්ම ඩිමෙන්ෂීයා විශාදය වැනි මානසික ආබාධ ඇතිවිය හැකිව තිබේ .
කෙසේ වුවද අවුරුදු තිස්පහ ඉක්මවූ පසු සුව දිවි සායන වෙත ගොස් රෝග ඇතිවීමට ඇති හැකියාව අවම කර ගැනීමට කටයුතු කරන ලෙස ශ්‍රී ජයවර්ධනපුර විශ්ව විද්‍යාලයේ පවුල් වෛද්‍ය විද්‍යා මහාචාර්ය ශ්‍යාමලී ඒකනායක මෙම මාධ්‍ය හමුවේදී වැඩිදුරටත් ප්‍රකාශ කළාය .