මව්වරු බිළිඳුන් මහමඟ දමා යනවා. එහෙම නොමැති නම් ඝාතනය කරනවා. එහෙම කරන්න එපා. බිළිඳුන් අපට දෙන්න යැයි ළමා හා කාන්තා කටයුතු රාජ්‍ය අමාත්‍ය ගීතා කුමාරසිංහ මහත්මිය ඉල්ලා සිටියි . ඇය මෙම ඉල්ලීම කළේ ජනාධිපති මාධ්‍ය කේන්ද්‍රයේදී පැවති මාධ්‍ය හමුවේදීය. රටේ පවතින ආර්ථික තත්ත්වය මත ළමයින් රැක බලා ගැනීමේ මධ්‍යස්ථානයක් අලුතින් නිර්මාණය කිරීම අසීරු කටයුත්තක්. නමුත් රජයේ රෝහල්වල වෙනම ම ස්ථාන සකස් කර ළමුන් රැක බලා ගැනීමේ ක්‍රමවේදයක් පිළිබඳව අවධානය යොමු කර තිබෙනවා.
මේ සම්බන්ධයෙන් අධිකරණ අමාත්‍යාංශය හා සෞඛ්‍ය අමාත්‍යාංශය සමඟ සාකච්ඡා කිරීමට කටයුතු කරනවා.මේ රටේ කාන්තා හිංසනය මෙන්ම ළමා අපචාර ප්‍රතිශතය යම් මට්ටමකට ඉහළ ගොස් තිබෙනවා. ළමා අපචාර සම්බන්ධයෙන් පාසල් මට්ටමින් ළමුන් දැනුම්වත් කිරීමට යෝජනා කර තිබෙනවා. පාසල් දැරියකට හෝ දරුවෙකුට ලිංගික අතවරයක් සිදු වූ විට අම්මාට හෝ තාත්තාට කීමට පැකිළෙනවා. ඇතැම් විට ඒ බව හොඳම යෙහෙළියට හෝ යහළුවාට කියන්න ඉඩ තිබෙනවා.
ඒ නිසා පාසල් ළමුන් මේ සම්බන්ධයෙන් කටයුතු කළ යුතු ආකාරය ගැන උපදේශන වැඩසටහන් පැවැත්විය යුතුයැයි ද රාජ්‍ය අමාත්‍යවරිය වැඩි දුරටත් සඳහන් කළාය.