– සැප්. 10 දා සිට ක්‍රියාත්මකයි
මාසයකට රුපියල් ලක්ෂයකට වඩා අඩු පොලී ආදායමක් ලබන්නේ නම් ජ්‍යෙෂ්ඨ පුරවැසියන්ගේ පොලී හා බදු ආදායම් මත අය කරන සියයට 05ක රඳවා ගැනීමේ බද්ද සැප්තැම්බර් 10 වැනිදායින් පසු ආපසු ගෙවීමට රජය තීරණය කර ඇත. ජ්‍යෙෂ්ඨ පුරවැසියන්ගේ රඳවා ගැනීමේ බද්ද අය කිරීමේ ඇති සානුකම්පිතභාවය පිළිබඳ මුදල් ඇමැතිවරයා වන ජනාධිපති රනිල් වික්‍රමසිංහ මහතා සමඟ සලකා බලා මේ තීරණය ගත් බව මුදල් රාජ්‍ය ඇමැති රංජිත් සියඹලාපිටිය මහතා කීය.
දේශීය ආදායම් දෙපාර්තමේන්තුවේ තක්සේරු නිලධාරින්ගේ සංගමයේ 10 වැනි සංවත්සරික මහ සභාව ඊයේ (29) දහවල් කොළඹ කොටුව කිංස්බරි හෝටලයේ පැවැති අවස්ථාවට ප්‍රධාන ආරාධිතයා ලෙස සහභාගි වෙමින් රාජ්‍ය ඇමැතිවරයා මේ කරුණු අනාවරණය කෙළේය.
එහිදී වැඩිදුරටත් අදහස් දැක්වූ රාජ්‍ය ඇමැතිවරයා,
ජ්‍යෙෂ්ඨ පුරවැසියන්ගෙන් පමණක් නොව වසරකට රුපියල් ලක්ෂ 12කට වඩා පොලී ආදායමක් ලබන අයගෙන් සියයට 5ක රඳවා ගැනීමේ බද්දක් මේ වසරේ (2023) ජනවාරි 01 වැනිදා සිට කියාත්මක කළා. නමුත් මාසයකට රුපියල් ලක්ෂයකට වඩා අඩු පොලී ආදායමක් ලබන ජ්‍යෙෂ්ඨ පුරවැසියන්ට ඒ රඳවා ගැනීමේ බද්ද නැවත ආපසු ගෙවන්නැයි ඉල්ලීම් ගණනාවක් ඇවිත් තිබෙනවා.
අපි ඒ පිළිබඳ සානුකම්පිතව සලකා බලා රඳවා ගැනීමේ බද්දට සියයට 05ක් කපාගෙන ඇති මාසයකට රුපියල් ලක්ෂයට වඩා අඩු පොලී ආදායමක් ලබන ජ්‍යෙෂ්ඨ පුරවැසියන්ට ඒ කපාගත් මුදල ගෙවන්න දේශීය ආදායම් දෙපාර්තමේන්තුව සමඟ සාකච්ඡා කළා. ඒ අනුව ලබන සැප්තැම්බර් 10 වැනිදා සිට කපාගත් මුදල ආපසු ගෙවීමට ඔවුන් එකඟතාව පළ කළා.
ජ්‍යෙෂ්ඨ පුරවැසියන්ගේ මාසික පොලී ආදායම රුපියල් ලක්ෂයට වඩා අඩු නම්, අවුරුද්දකට පොලී ආදායම ලක්ෂ 12ට අඩු නම් මේ රඳවා ගැනීමේ බදු ආපසු ගෙවන්න පියවර ගන්න යැයි රාජ්‍ය ඇමැතිවරයා මේ හමුවේදී ඉල්ලීමක් ද කෙළේය. ජනාධිපති අධ්‍යක්ෂ ජනරාල් (රාජ්‍ය ආදායම්) එම්.ජේ. ගුණසිරි, ආදායම් කොමසාරිස් ජනරාල් එම්.එස්.එම්. ෂියාම් යන මහත්වරු ද මෙහිදී කතා කළහ.