පාතාල අපරාධකරුවන් ට්‍රේල් වර්ගයේ යතුරුපැදිවලින් ලුහුබැඳ ගොස් පහරදීම (Moving Target) සඳහා විශේෂ පුහුණුව ලත් කණ්ඩායමක් ලබන සතියේ සිට මෙහෙයුම්වලට යොදවන බව පොලිස්පති දේශබන්දු තෙන්නකෝන් ‘අරුණ’ කළ විමසුමකදී පැවැසීය.
‘ආරක්ෂක ඇස (Security Eye)’ නමින් වූ ලාංඡනයක් පලඳින මෙම ඒකකය සඳහා යොදාගන්නා කණ්ඩායම සටන් කලාවද ප්‍රගුණ කර ඇත.
වත්මන් පොලිස්පතිවරයා නුගේගොඩ ජ්‍යෙෂ්ඨ පොලිස් අධිකාරිවරයා ලෙස සිටියදී ක්‍රියාත්මක කළ ‘ආරක්ෂක ඇස’ සංකල්පය වැඩිදියුණු කරමින් මෙම ඒකකය නිර්මාණය කර තිබේ.
පාතාල ක්‍රියාකාරකම් බහුල ප්‍රදේශවල මෙම කණ්ඩායම් යෙදවීමට නියමිත අතර පොලිස් නිල ඇඳුමට සමානව විශේෂ නිල ඇඳුමක් ඔවුන්ට ලබාදීමට සැලසුම් කර ඇත.
පොලිස් විශේෂ කාර්ය බළකායේ විශේෂ පුහුණුව ලත් මෙම කණ්ඩායමට ට්‍රේල් වර්ගයේ යතුරුපැදි 100 ක් ලබාදී ඇත. පොලිස් විශේෂ කාර්ය බළකා යතුරුපැදි බළකායත් සමග ඒකාබද්ධව අදාළ මෙහෙයුම් සිදුකිරීමට නියමිතය.