රාජ්‍ය සේවකයන් සඳහා වන අග්‍රහාර අරමුදලෙන් රුපියල් හැටතුන් ලක්ෂයක් සිය ගිණුමට බැර කර ගත් බව කියන එම රක්ෂණ භාර මණ්ඩලයේ නිලධාරිනියකගේ වැඩ තහනම් කර තිබෙන අතර එම සිද්ධිය සම්බන්ධයෙන් එහි කාර්ය මණ්ඩලයේ දසදෙනකුට පමණ චෝදනා පත්‍ර භාර දී තිබේ.
මීට පෙර ද රුපියල් හැට හතර ලක්ෂයක් සිය ගිණුමට බැර කර ගත් බව කියන එහි නිලධාරිනිකගේ වැඩ තහනම් කර මේ වන විට නීතිමය ක්‍රියාමාර්ගද ගෙන තිබේ. මෙම දෙදෙනාගේම ස්වාමි පුරුෂයන් පොලිස් නිලධාරීහු වෙති. එක් නිලධාරිනියකගේ වැඩ තහනම් කර ඇත්තේ මීට මාස කිහිපයකට පෙර වන අතර අනෙක් නිලධාරිනියට එම දඬුවම ලබා දී ඇත්තේ මීට සති කිහිපයකට පෙරය. එම නිලධාරිනිය සම්බන්ධයෙන් පොලිස් විශේෂ විමර්ශන අංශයකින් පරීක්ෂණයක් පැවැත්වේ.
අරමුදලේ සාමාජිකයන් සඳහා කූට ලේඛන සකසමින් දීර්ඝ කාලයක් තිස්සේ මෙම වංචාව සිදුකර තිබෙන බවත් සැත්කම් සිදුකළ බවට සකසන ලද කූට ලේඛන මේ වන විට සොයා ගැනීමට හැකිව තිබෙන බවත් ඉහත ආරංචි මාර්ග ප්‍රකාශ කළේය. කූට ලේඛන සකස් කර ඇත්තේ එම සාමාජිකයන් සැත්කම් සිදු කළ බව හැඟවීමටය.
මෙම අරමුදල සඳහා රාජ්‍ය සේවකයන්ගෙන් මාසිකව රුපියල් හයසියයක් අය කෙරේ. මොළය සම්බන්ධ සැත්කම් සඳහා රුපියල් ලක්ෂ දොළහක් ද හදවත් සැත්කම් වෙනුවෙන් රුපියල් ලක්ෂ දහයක්ද වශයෙන් විවිධ ආබාධ සඳහා මෙමගින් ප්‍රතිලාභ හිමි වේ. මෙම සියලු සැත්කම් යොමු කෙරෙන්නේ පෞද්ගලික රෝහල්වලටය. එම රෝහල් කාර්ය මණඩලවලද සහය මත මෙම වංචාව සිදු කර තිබෙන බව දැනට කර ඇති පරීක්ෂණවලින් හෙළි වී තිබේ.