මරණය යනු මෙලොව ජීවත්වන සෑම පුද්ගලයෙකුටම උරුම වූ දෙයක් බව නොරහසක්.
ඇතැමෙක් මරණයට බියක් දක්වන අතර ඇතැමෙක් මරණයට බියක් නොදැක්වන අවස්ථාව අපට මුණ ගැසෙනවා.
කෙසේ වෙතත් සමීක්ෂණයක් මඟින් මරණය කල්දමා ගන්නා ක්‍රමයක් පිළිබඳව සමස්ත ප්‍රජාවගේම අවධානය මේ මොහොතේ යොමුව පවතිනවා.
එම සමීක්ෂණය මඟින් අනාවරණය වී ඇත්තේ සෞඛ්‍ය සම්පන්න ජීවිතයක් ගතකිරීම සඳහා දිනකට අඩි 5000ක් ඇවිදීම ප්‍රමාණවත් බවයි.
මීට පෙර වාර්තා අනුව සඳහන් කෙරුණේ සෞඛ්‍ය සම්පන්න ජීවිතයක් ගතකිරීමට නම් මිනිසෙකු දෛනිකව අඩි 10,000ක් ඇවිදිය යුතු‍ය යන්නයි.
මෙම නව සමීක්ෂණය සඳහා පුද්ගලයින් 226,000ක් යොදාගෙන ඇති බව විදෙස් මාධ්‍ය වාර්තා කරන අතර එම පර්‍යේක්ෂකයන් පෙන්වා දෙන්නේ අඩි 4000ක් ඇවිදින පුද්ගලයෙකු නියමිත ආයු කාලයට පෙර මියයාමේ සම්භාවිතාව ඉතා අඩු බවයි.
මේ අතර එම පර්යේෂකයින් වැඩිදුරටත් පෙන්වා දෙන්නේ ඇවිදින ප්‍රමාණය වැඩිවන තරමට ඉන් මිනිස් සිරුරට ලැබෙන ප්‍රතිලාභ ඉහළයන බවත් හෘදය සහ රුධිර සංසරණ පද්ධතිය නිරෝගීමත් කරගැනීම සඳහා දෛනිකව අඩි 2300ක් ඇවිදීම මිනිසෙකුට ප්‍රමාණවත් බවත් පර්‍යේක්ෂකයින් විසින් පෙන්වා දෙනු ලබනවා.
ඒ අනුව අඩි 4000 සිට ඉහළට අඩි 20,000 දක්වා වැඩිවන සෑම අඩි 1000කටම මිනිසෙකු අඩු වයසින් මියයාමේ සම්භාවිතාව ඉතා අඩු වන බවයි විදෙස් මාධ්‍ය වාර්තා කොට සිටින්නේ.
එසේම මෙහිදී එම පර්යේෂකයින් වැඩිදුරටත් පවසන්නේ ලෝක සෞඛ්‍ය සංවිධානයේ දත්තවලට අනුව නිසි ක්‍රියාකාරකම්වල නොයෙදීම හේතුවෙන් ලොව සෑම වසරකම මියයන සංඛ්‍යාව මිලියන 3.2ක අගයක් ගන්නා බවයි.