හංවැල්ල පාලම යට සිරවි තිබූ වාරිමාර්ග දෙපාර්තමේන්තුවට අයත් මිල අධික ජල මාපකයක් සොයා ගැනීමට නාවික හමුදා කිමිදුම් කණ්ඩායමක් සමත්ව තිබෙනවා.
එය වාරිමාර්ග දෙපාර්තමේන්තුව මගින් කැළණි ගඟේ ජල මට්ටම, වේගය සහ දිශාව වැනි දත්ත රැස් කිරීම සඳහා හංවැල්ල පාලම යට ජලයේ මතුපිට තබන ලබන ජල මාපකයෙහි GPS යන්ත්‍රයක් බවයි පැවසෙන්නේ.
ජලය සමග ගසාගෙන පැමිණි එය උණ පඳුරු සහ කැලිකසල තුළ පැටලී ප්‍රධාන යන්ත්‍ර‍යෙන් ගැලවී ගොස් ඇති අතර එම GPS යන්ත්‍රය සොයා ගැනීම සඳහා නාවික හමුදා කිමිදුම් සහය ලබා දෙන ලෙසත් වාරිමාර්ග දෙපාර්තමේන්තුව නාවික හමුදාවෙන් ඉල්ලීමක්ද කර තිබුණා.
ඒ අනුව නාවික හමුදාව, බටහිර නාවික විධානයට අයත් විශේෂ කිමිදුම් කණ්ඩායමක් පසුගිය ජුනි 4 වැනි දින අළුයම කිමිදුම් සහය ලබා දීම සඳහා හංවැල්ල ප්‍රදේශයට යොමු කර ඇති අතර ඒ අනුව පවත්නා අධික වර්ශාව හමුවේ කැළණි ගඟේ ජලය පිටාර මට්ටමට පැමිණ ඇති අවධානම හමුවේ වුවද නාවික හමුදා කණ්ඩායම මහත් පරිශ්‍රමයක් දරමින් කැලි කසළ තුල සිරවී තිබූ මෙම යන්ත්‍රය සොයාගෙන තිබෙනවා.
සොයාගත් යන්ත්‍රය පසුව වාරිමාර්ග දෙපාර්තමේන්තුව වෙත ලබා දුන් බවයි නාවික හමුදාව පැවසුවේ.
