ලයින් කාමරක තාවකාලිකව පදිංචියට පැමිණි 21 හැවිරිදි තරුණ යුවලක් විසින් තම මාස පහක කුඩා දරුවෙකු ලයින් කාමරයක දමා පළා ගොස් ඇතැයි වාර්තා වෙනවා.
මොවුන් පසුගිය 22 වැනි දින වතු නිවාස පේලියේ පදිංචි පුද්ගලයෙකු අමතා තමන් විදේශ ගතවන බැවින් කාමරයේ සිටින පිරිමි දරුවා කාටහෝ දී රැකබලා ගැනීමට කටයුතු කරන ලෙස පවසා තිබෙනවා.
එසේ පවසා දරුවාගේ මව සහ පියා ඇමතුම් ලබා දුන් ජංගම දුරකථනය එදින පස්වරු 3.00 සිට ක්‍රියා විරහිතව තිබෙන බවත් ඔවුන් සැබෑ ලෙසම විදේශ ගත වූයේද නැතහොත් එසේ අඟවමින් මෙරට සැඟව රැඳී සිටින්නේද යන්න පොලීසිය මේ වනවිට විමර්ශණ ආරම්භ කර තිබෙනවා.
ඇමතුම ලද පුද්ගලයා විසින් අදාල සිද්ධිය සම්බන්ධව වතු පාලනාධිකාරිය දැනුවත් කර ඇති අතර වත්තේ පවුල් සෞඛ්‍ය සේවිකාව මගින් දරුවා දෙල්තොට රෝහලට ඇතුලත් කර තිබුණා.
මඩකළපුව වාකරය ප්‍රදේශයේ පදිංචි බව කියන මෙම යුවළ මෙයට සති දෙකකට පමණ පෙර මෙම ලයින් කාමරයක තාවකාලිකව පදිංචියට පැමිණ ඇති අතර ඔවුන්ට නවාතැන් ලබා දී ඇත්තේ මානසික ආබාධයකින් පෙලෙන මහළු කාන්තාවකි. කෙසේ වෙතත් යුවළ ඔවුන්ගේ ඥාතියෙකුද යන්න සම්බන්ධයෙන් සැකයක් මතුව ඇති බවත් අදාළ මහළු කත සැබෑ ලෙසම මානසික රෝගී තත්ත්වයෙන් පෙලෙන්නේද යන්න සම්බන්ධයෙන්ද පොලීසිය මේ වනවිට සැකයක් මතුව තිබෙනවා.
තරුණ යුවළ තාවකාලිකව මෙම ලයින් කාමරයට පැමිණ ඇත්තේ දරුවා එහි තබා පළා යාමටද යන්න සම්බන්දයෙන් ද පොලීසිය සැක පළ කරන අතර මව්කිරි ලබා දීමේ පහසුකම් රෝහල සතුව නොමැති බැවින් දරුවා පේරාදෙණිය රෝහල වෙත යොමු කර ඇතැයිද ගලහ දෙල්තොට රෝහලේ සෞඛ්‍ය වෛද්‍ය නිලධාරිවරයා පවසනවා.
කෙසේ වෙතත් පළා ගිය මව්පියන් සම්බන්ධව පොලීසිය මේ වන විට විශේෂ විමර්ශණයක් ආරම්භ කර තිබෙනවා.