ශ්‍රීලන්කන් ගුවන් යානයකට පාකිස්තානයේ ලාහෝර් නුවරදී රිංගූ මීයකු ඇල්ලීමට දින තුනක කාලයක් ගතවී ඇතැයි අනාවරණය වේ. ශ්‍රීලන්කන් ගුවන් යානය තුළ මීයකු සිටින බව පාකිස්තානයේ ලාහෝර් නුවරදී ගුවන් මගියකු ගුවන් යානයේ සේවකයන්ට දැනුම්දී තිබේ. මෙම ගුවන් යානය ඉකුත් 22 වැනිදා කටුනායක ගුවන් තොටුපොළට පැමිණි පසු මීයා ඇල්ලීමේ මෙහෙයුම ක්‍රියාත්මක කර තිබේ.
ඒ අනුව, ඉකුත් 25 වැනිදා මීයා අල්ලා ගැනීමට හැකිවූ බව ශ්‍රී ලංකා ගුවන් සමාගමේ නිලධාරීහු කියා සිටිති. ශ්‍රී ලංකා ගුවන් සේවයේ ගුවන් ගමන් ප්‍රමාදවීම සහ අවලංගුවීම සම්බන්ධයෙන් වරාය, නාවික හා ගුවන් සේවා අමාත්‍යාංශයේ ඊයේ (26 වැනිදා) පැවැති මාධ්‍ය හමුවකදී මෙම තොරතුරු අනාවරණය විය. ඇමැති නිමල් සිරිපාල ද සිල්වාගේ ප්‍රධානත්වයෙන් පැවැති මෙම මාධ්‍ය හමුවට ශ්‍රීලන්කන් ගුවන් සමාගමේ සභාපති අශෝක් පතිරණ ඇතුළු නිලධාරිහු සහභාගි වූහ.
