පෞද්ගලික පාසල් හා සිසුන් සියයට වැඩි මහාපරිමාණ පෞද්ගලික උපකාරක පන්ති මගින් උපයන සැබෑ ආදායම සොයා ගැනීම සඳහා ආරම්භ කිරීමට නියමිත යාන්ත්‍රණය සදහා සම්පුර්ණ සහය ලබා දීමට ග්‍රාම නිලධාරින් සුදානම් වේ.
මෙලෙස උපයන සැබෑ ආදායම සොයා ගැනීම සඳහා ග්‍රාම නිලධාරීන්ගේ සහය ඇතිව යාන්ත්‍රණයක් සකස් කරන ලෙස ක්‍රම සහ විධි පිළිබඳ කාරක සභාව දේශීය ආදායම් දෙපාර්තමේන්තුවට නිර්දේශ කර තිබේ.
ඒ අනුව ඊට අවශ්‍ය සියලු සහාය සහ අවශ්‍ය සියලු තොරතුරු ලබාදීමට පියවර ගන්නා බව ශ්‍රී ලංකා එක්සත් ග්‍රාම නිලධාරි සංගමයේ සභාපති නන්දන රණසිංහ පැවසීය.
එමෙන්ම මෙම යාන්ත්‍රණය ක්‍රියාත්මක කිරීම සදහා ග්‍රාම නිලධාරීන්ට අවශ්‍ය බලතල ලබා දෙන ලෙසත් ඒ සඳහා සාධනීය ගෙවීමක් කරන ලෙසත් සභාපතිවරයා අදාළ බලධාරීන්ගෙන් ඉල්ලීමක් ද කළේය.
කෙසේ වෙතත් මෙම ආයතනවලට අමතරව සෞඛ්‍ය සේවා සපයන මධ්‍යස්ථාන, පෞද්ගලික රෝහල්, මිනින්දෝරුවන්, ඉංජිනේරුවන්, නීති ආයතන සහ රූපවාහිනී මෙන්ම ගුවන් විදුලි සේවාවන් සඳහා ද මෙම යාන්ත්‍රණය ක්‍රියාත්මක කරන ලෙසත් කාරක සභාව නිර්දේශයේ සඳහන් වෙයි.
මෙම ආයතන මගින් උපයන සැබෑ ආදායම පිළිබඳ නිවැරදි තොරතුරු ලබා ගැනීම අභියෝගාත්මක විය හැකි නමුත් ග්‍රාම නිලධාරීන්ගේ සහය ඇතිව ප්‍රශ්නාවලියක් මගින් එම තොරතුරු ලබා ගැනීමට හැකි බවත් එම කාරක සභාව විසින් පසුගිය පළමුවැනිදා පාර්ලිමේන්තුවට ඉදිරිපත් කරන ලද වාර්තාවේ සඳහන්ව ඇත.
මෙම වාර්තාව කාරක සභා සභාපති, පාර්ලිමේන්තු මන්ත්‍රි පාඨලී චම්පික රණවක විසින් ඉදිරිපත් කර තිබුණි.
මේ පිළිබඳව ඊයේ (04) ‘දිනපතා අරුණ’ පුවත්පතේ ප්‍රධාන සිරස්තලය මගින් කරුණු අනාවරණය කළේය.