හංවැල්ල ප්රදේශයේ දී තම දරුවන් දෙදෙනා ප්රාණ ඇපයට තබාගෙන සිටි පියෙකු පොලිස් විශේෂ කාර්ය බළකාය සිදුකළ විශේෂ මෙහෙයුමක දී අත්අඩංගුවට ගෙන තිබෙනවා.
ඊයේ (05) රාත්රී කාලයේ හංවැල්ල, ජල්තර, රාජ්ය සේවක නිවාස සංකීර්ණයේ පදිංචි පුද්ගලයෙකු තම බිරිඳ ඝාතනය කිරීම සඳහා අත්බෝම්බයක් ද රැගෙන සිය නිවස වෙත පැමිණ ඇති බව සඳහන්.
කෙසේවෙතත් එම අවස්ථාවේ දී කාන්තාව නිවසින් පළාගොස් ඇති අතර අදාළ පුද්ගලයා විසින් ඔහුගේ දරුවන් දෙදෙනා නිවසේ කාමරයක ප්රාණ ඇපයට තබාගෙන සිට තිබුණා.
වයස අවුරුදු 10ක දැරියක් සහ වයස අවුරුදු දෙකක කුඩා පිරිමි ළමයෙකු මෙලෙස ප්රාණ ඇපයට ගෙන සිටි බව වාර්තා වනවා.
මේ සම්බන්ධයෙන් ලද තොරතුරක් මත වහාම ක්රියාත්මක වු හංවැල්ල පොලීසියේ නිලධාරීන් කණ්ඩායමක් සහ පොලිස් විශේෂ කාර්ය බළකායේ බෝම්බ නිෂ්ක්රීය අංශයේ නිලධාරීන් කණ්ඩායමක් එම ස්ථානයට ගොස් මෙහෙයුමක් ආරම්භ කර තිබෙනවා.
පැයක පමණ කාලයකට පසුව දරුවන් නිරුපද්රිතව බේරා ගැනීමට පොලිස් විශේෂ කාර්ය බළකායට හැකියාව ලැබී ඇති අතර අදාළ පුද්ගලයා ද අත්අඩංගුවට ගෙන ඇති බව පොලිසිය සඳහන් කළා.
